जनकपुरधाम, १६ माघ । सर्लाहीमा रात्रि बसले मोटरसाइकललाई ठक्कर दिँदा एकजनाको मृत्यु भएको छ भने १३ जना घाइते भएका छन् ।

पूर्वपश्चिम राजमार्ग अन्तर्गत सर्लाहीको ईश्वरपुर नगरपालिका वडा नम्बर–१२ बाँके जंगलमा शनिबार राति सिरहाबाट काठमाडौंतर्फ जाँदै गरेको ना ७ ख ७५३ नम्बरको बसले ना २९ प ४४९८ नम्बरको मोटरसाइकललाई ठक्कर दिएको थियो ।

बसको ठक्करबाट मोटरसाइकलको पछाडि सवार ईश्वरपुर नगरपालिका वडा नम्बर–१२ घारीबथान बस्ने २७ वर्षीय भक्त बहादुर खड्काको घटनास्थलमै मृत्यु भएको जिल्ला प्रहरी कार्यालय सर्लाहीले जनाएको छ ।

खड्काको शव पोष्टमार्टमका लागि जिल्ला अस्पताल मलंगवामा राखिएको प्रहरीले जनाएको छ ।

मोटरसाइकललाई ठक्कर दिएपछि बस पल्टिंदा बसमा सवार ४० मध्ये १२ जना यात्रु घाइते भएका छन् । घाइते मध्ये एकजनालाई थप उपचारका लागि सिरहा पठाइएको छ ।

घाइतेमध्ये ७ जना लालबन्दी मोडेल अस्पतालमा उपचारपछि घर फर्केका छन् । चार जनाको भने सोही अस्पतालमा उपचार भइरहेको जिल्ला प्रहरी कार्यालयले जनाएको छ ।