सर्लाही, १४ माघ । सर्लाहीमा रोकिराखेको ट्याक्टरमा बस ठोक्किँदा २५ जना घाइते भएका छन् ।

बिहीबार राति भैरहवाबाट विराटनगरतर्फ जाँदै गरेको लु २ ख ४७५७ नम्बरको बस हरिवन–९ सुखेपोखरीमा बिग्रिएर रोकिराखेको उखु लोड गरेको ज २ त ७८१ नम्बरको ट्याक्टरमा ठोक्किँदा दुर्घटना भएको थियो ।

पश्चिमबाट उखु लिएर हरिवनस्थित इन्दु शंकर चिनी उद्योगतर्फ जाँदै गरेको ट्याक्टर बिग्रिएपछि बनाउनका लागि सडक छेउमा रोकेर राखेको बेला दुर्घटना भएको जिल्ला प्रहरी कार्यालय सर्लाहीका प्रवक्ता प्रहरी नायव उपरीक्षक माधवप्रसाद बुढाथोकीले जानकारी दिए ।

घाइतेमध्ये एक पुरुष र एक महिलाको अवस्था गम्भीर रहेको र उनीहरूलाई थप उपचारका लागि वीरगन्ज रेफर गरिएको प्रहरीले जनाएको छ ।

अन्य घाइतेहरूको हरिवनस्थित नमूना, स्वाभिमान लगायतका अस्पतालमा उपचार भइरहेको छ । बसका चालकलाई प्रहरीले नियन्त्रणमा लिएको छ भने ट्याक्टरका चालक फरार भएका छन् ।

घटना विषयमा थप अनुसन्धान भईरहेको जिल्ला प्रहरी कार्यालय सर्लाहीले जनाएको छ ।