बारामा रथले किचिएर दुईजनाको मृत्यु, १२ जना घाइते

बारा, ११ माघ । बारामा सोमबार साँझ रथले किचिएर दुईजनाको मृत्यु भएको छ भने १२ जना घाइते भएका छन् ।
मृत्यु हुनेमा बाराको आदर्शकोतवाल गाउँपालिका–३ बत्रा बस्ने २५ वर्षीया बालकुमारी देवी राम र १६ वर्षीया निलम कुमारी राम छन् ।
रथ अचानक तीव्र गतिमा कुदेको र अगाडी रहेका मानिसहरुलाई किच्दा दुबैजनाको घटनास्थलमै मृत्यु भएको सोही वडाका वडाध्यक्ष धर्मेन्द्र यादवले जानकारी दिए ।
स्थानीय लक्ष्मण महरा चमारको विवाहका लागि तयार गरिएको रथ अचानक अनियन्त्रित भई किच्दा अन्य १२ जना घाइते भएका छन् ।
घाइते मध्ये ६ जनाको अवस्था गम्भीर रहेको जनाइएको छ । घाइतेहरुको कलैया अस्पतालमा उपचार भइरहेको छ ।
घटना विषयमा थप अनुसन्धान भइरहेको जिल्ला प्रहरी कार्यालय बाराका प्रवक्ता प्रहरी नायव उपरीक्षक राजेश थापाले जानकारी दिए ।

