जनकपुरधाम, १० माघ । मधेस प्रदेशमा सवारी दुर्घटनामा परेर प्रत्येक दिन एकभन्दा बढी व्यक्तिको मृत्यु भईरहेको छ ।

मधेस प्रदेश प्रहरीले सार्वजनिक गरेको तथ्यांक अनुसार पछिल्लो ६ महिनामा सवारी दुर्घटनामा परेर प्रदेशमा २९२ जनाको मृत्यु भएको छ ।

चालु आर्थिक वर्षको साउनदेखि पुससम्ममा प्रदेशको विभिन्न जिल्लामा २ हजार ८५९ सवारी दुर्घटनामा २९२ जनाले ज्यान गुमाएका छन् ।

प्रदेश प्रहरीका प्रवक्ता प्रहरी उपरीक्षक तुलबहादुर कार्कीका अनुसार मृतक २९२ मध्ये २५२ पुरुष र ४७ जना महिला छन् । सोही अवधिमा दुर्घटनामा परेर ४ हजार २३८ जना घाइते भएका छन् । घाइतेमध्ये ८८० जना महिला छन् ।

प्रहरीले यस ६ महिनाको अवधिमा १ लाख ३६ हजार ४ वटा गाडीहरुलाई कारवाही गर्दा ११ करोड ८९ लाख २५ हजार ५ सय रुपैयाँ राजश्व संकलन भएको प्रदेश प्रहरीको तथ्यांक छ ।