सर्लाही, ८ माघ । सर्लाहीको बागमती पुलमा मोटरसाइकल र टिपर एकआपसमा ठोक्किँदा एक युवकको मृत्यु भएको छ ।

मृत्यु हुनेमा सर्लाहीको हरिवन नगरपालिका–५ घुर्कौली बस्ने ३४ वर्षीय सुनिल बम्जन रहेका छन् ।

शुक्रबार राति पूर्वपश्चिम राजमार्ग अन्तर्गत बागमती नगरपालिका–१२ स्थित बागमती पुलमा मोटरसाइकल टिपरमा ठोक्किँदा उनको मृत्यु भएको प्रहरीले जनाएको छ ।

प्रहरीका अनुसार पश्चिमबाट पूर्वतर्फ जाँदै गरेको बम्जन सवार बा ९४ प ५९०८ नम्बरको मोटरसाइकल सोही दिशातर्फ जाँदै गरेको ना ७ ख ८३०० नम्बरको टिपरमा ठोक्किँदा घटना भएको प्रहरीले जनाएको छ ।

दुर्घटनामा गम्भीर घाइते भएका बम्जनलाई उपचारका लागि अस्पताल लैजाँदै गर्दा बाटोमै मृत्यु भएको जिल्ला प्रहरी कार्यालय सर्लाहीले जनाएको छ ।

मृतक बम्जन सर्लाहीका माओवादी केन्द्र निकट युवा संगठन वाइसिएलको नेता थिए ।