सप्तरीमा ट्याक्टर दुर्घटना हुँदा एक युवकको मृत्यु

सप्तरी, १ माघ । सप्तरीमा ट्याक्टर दुर्घटना हुँदा एक युवकको मृत्यु भएको छ ।
मृत्यु हुनेमा जिल्लाको हनुमानगर कंकालिनी नगरपालिका–६ का २३ वर्षका धिरज सदा रहेको प्रहरीले जनाएको छ ।
स १ त २७६ नम्बरको ट्याक्टर लिएर माटो लिन जाने क्रममा अनियन्त्रित भई कोशीको पश्चिमी नहरमा पल्टिँदा सदाको मृत्यु भएको जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक माधवप्रसाद काफ्लेले बताए ।
ट्याक्टरका चालक खाना खाइरहेको अवस्थामा सदाले ट्याक्टर गुडाएर माटो लिन गएको र त्यस क्रममा ट्याक्टर पल्टिएको डीएसपी काफ्लेले जानकारी दिए । ट्याक्टर पल्टिँदा पानीमा डुबेको शव प्रहरीले बाहिर निकालेको थियो ।
मृतकको शव पोष्टमार्टमका लागि राजविराजस्थित गजेन्द्रनारायण सिंह अस्पताल ल्याइएको र ट्याक्टरलाई नियन्त्रणमा लिएर अनुसन्धान भईरहेको डीएसपी काफ्लेले बताए ।

