सप्तरीमा मोटरसाइकल दुर्घटनामा परी दुई जनाको मृत्यु

सप्तरी, १८ पुस । सप्तरीमा मोटरसाइकल दुर्घटनामा परी दुई जनाको मृत्यु भएको छ ।
कञ्चनपुर–फत्तेपुर भित्रि सडक खण्डअन्तर्गत सप्तरीको सप्तकोसी नगरपालिका–४ तुलसी टोलमा आइतबार दुईवटा मोटरसाइकल एकआपसमा ठोक्किएर दुर्घटना हुँदा दुई जनाको मृत्यु भएको प्रहरीले जनाएको छ ।
मृत्यु हुनेमा सप्तरी कञ्चनरुप नगरपालिका–७ का सुभास बस्नेत र उदयपुर चौदण्डीगढी नगरपालिका–९ भिमाटोलका २८ वर्षीय हरिशङ्कर चौधरी रहेको जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक माधवप्रसाद काफ्लेले बताए । उनीहरु दुबैजनाको उपचारका क्रममा गोल्डेन अस्पताल विराटनगरमा मृत्यु भएको उनले जानकारी दिए ।
कञ्चनपुरबाट फत्तेपुरतर्फ जाँदै गरेको को २२ प १५५८ र विपरीत दिशाबाट आउँदै गरेको को २२ प १५५८ नम्बरको मोटरसाइकल एक आपसमा ठोक्किएको थियो ।
दुर्घटनामा परी को २२ प १५५८ नम्बरको मोटरसाइकलमा सवार सुभास बस्नेतकी ३० वर्षीया श्रीमती ममता सापकोटा, ८ वर्षीय छोरा सम्मर बस्नेत र एक वर्षीया छोरी सिम्रिका बस्नेत घाइते भएका छन् ।
त्यस्तै को २२ प १५५८ नम्बरको मोटरसाइकलमा सवार सप्तरीको सप्तकोशी नगरपलिका–९ का २६ वर्षीय रोहित चौधरीसमेत घाइते भएका छन् । उनीहरुको स्थानीय अस्पतालमा उपचार भइरहेको र घटनाबारे थप अनुसन्धान भइरहेको डीएसपी काफ्लेले बताए ।

