रौतहट, १३ पुस । रौतहटमा जन्ती बोकेको स्कोर्पियो दुर्घटना हुँदा ५ जनाको मृत्यु भएको छ ।

गौरबाट चन्द्रनिगाहपुरतर्फ जाँदै गरेको बीआर ०५पीए ६९५३ नम्बरको भारतीय गाडी दुर्घटना हुँदा ५ जनाको मृत्यु भएको जिल्ला प्रहरी कार्यालय रौतहटका प्रवक्ता प्रहरी नायव उपरिक्षक सुनील मल्लले जानकारी दिए ।

मंगलबार करिव ४ बजेर १० मिनेटमा जन्ती बोकेको गाडी अनियन्त्रित भएर दुर्घटना भएको र सो दुर्घटामा परी ५ जनाको मृत्यु भएको उनले बताए । ७ जना सवार रहेकामध्ये दुई जना घाइते भएको डीएसपी मल्लले बताए ।

घाइते दुईजनामध्ये एक जनाको स्थानीय अस्पतालमा उपचार भइरहेको र अर्का घाइतेलाई उपचारका लागि वीरगञ्ज पठाइएको प्रवक्ता मल्लले जानकारी दिए ।

उनका अनुसार गरुडा नगरपालिकाको जयनगरमा अनियन्त्रित हुँदा जीप दुर्घटना भएको प्रारम्भिक अनुमान गरिएको छ । मृतक र घाइतेको परिचय खुल्न बाँकी रहेको उनले बताए ।