काठमाडौं, ६ पुस । काठमाडौं मोडल कलेजमा अध्ययनरत एक विद्यार्थीको मृत्यु भएको छ । मृत्यु हुनेमा रौतहटका १८ वर्षीय सुशील सहनी रहेका छन् । कलेजको होस्टेलमा बस्दै आएका उनी बाथरुममा बेहोस भएका थिए ।

प्रहरीका अनुसार बाथरुममा बेहोस भएको अवस्थामा भेटिएपछि उनलाई सोमबार दिउँसो करिव ४ बजे अस्पताल लगिएको थियो ।

महानगरीय प्रहरी परिसर काठमाडौंका प्रहरी उपरीक्षक दिनेशराज मैनालीले ग्यास गिजरमा पानी तताएर नुहाउन खोज्दा भेन्टिलेसनको कमीले सहनी बेहोस भएको हुनसक्ने बताए ।

उनले भने, ‘अहिलेसम्म ग्यास गिजरको कारण मृत्यु भएको भन्ने छ । प्रहरीले अनुसन्धान गरिरहेको छ ।’ कक्षा ११ मा पढ्ने सहनीको मृत्यु भएपछि आज विद्यार्थीले प्रदर्शन गरेका छन् ।