एजेन्सी, ४ कार्तिक । अमेरिकाको डेमोक्रेटिक पार्टीकी नेतृ तथा पूर्वसांसद तुलसी गबार्डले बंगलादेशमा भएको हिंसाको निन्दा गरेकी छन् । उनले प्रधानमन्त्री शेख हसिनालाई हिन्दू समेत सबै धार्मिक अल्पसंख्यकको सुरक्षा गर्न माग गरेकी छन् ।

गबार्डले ४० सेकेन्ड लामो भिडियो ट्विटरमा पोस्ट गर्दैै बंगलादेशमा हिन्दूमाथि भएको हिंसाप्रति दुःख व्यक्त गरेकी छन् । उनले भिडियो सन्देशमा भनेकी छन्, ‘बंगलादेशमा भगवानका भक्तप्रति यस्तो अपमान र हिंसा देखेर मेरो दिल टुट्यो ।’

बंगलादेशमा बडादसैंको दुर्गापुजाको क्रममा कुरानको कथित अपमानको अफवाहलाई लिएर हिंसा भड्किएको थियो । जसमा कम्तिमा ५ जनाले ज्यान गुमाएका छन् ।

मुस्लिम धर्मावलम्बीले इस्कन मन्दिरसहित केही हिन्दू मन्दिर र पूजास्थलमा आक्रमण गरेका थिए । सो क्रममा उनीहरुले मुर्तीहरु तोड्नुका साथै घरहरुमा आगो लगाइदिएका थिए ।